DIY廚房紙巾套

我怕廚房紙會痴塵痴貓毛，就用個膠袋笠住。。。但其實幾肉酸。。。
早幾日，訂左既布又未返到，有order都冇得做。咁得閒之下，就令我想試下整個套套住個廚房紙。
簡簡單單咁整已經美觀好多喇!哈哈哈
大家得閒都試下DIY啦！

K.Danana's Hand Made 開張喇!

搞左幾個月，我間網店終於開張喇!
有喵星人為我打頭陣!喵~

想睇多d就去我fb啦
https://m.facebook.com/K.Dananas

K.DANANA'S HAND MADE 為小女子之小本經營小店
賣手造袋, 公仔, 褲等手作....請多多支持!多謝!!!
有興趣請add K Danana's Hand Made 成為朋友, 不時會有新作品上架^^

Hand Made Tote Bag

幫完媽媽車百家被之後，家姐無啦啦又話佢裁左塊布好耐，想車袋，但又冇時間wor...

okok.比我車啦，我咁得閒。
點知。。。塊布係裁錯的。。。哈哈

okok.比我諗諗佢。。。
一邊諗一邊車，我又車好左喇yeah!!!!!!
Hand Made Tote Bag. 手造單肩/手提袋。

健康西多士?

今日整左芝士火腿西多士做早餐。冇落油去煎，一滴都冇。好味又唔肥。

西多士最致命就係油炸! 其實唔落油就真係一d都唔肥囉。唔落油點整西多? 我係放入焗爐焗既。
出黎個樣仲好靚仔添！

冇油，健康，低脂又唔肥既西多做法:

1。1隻蛋加1茶匙粟粉用筷子發打到冇粉粒

2。用錫紙整出一個兜，用黎裝住件多士入焗爐用既

3。2片方包夾芝士火腿，之後平均地沾上蛋汁，放入錫紙兜，多餘既蛋汁倒係多士個面

4。焗爐200度焗15min。完。

冇油就一定會痴底，一定要用錫紙啊！

但我又覺得呢個痴底既情況唔算痴到冇得食，可以接受wor...你睇下喇

喂！你諗下，唔肥既西多wor...痴少少可以接受丫。

okok真係接受唔到咪掃少少油係錫紙兜上面囉。肥少少囉咁。嘻嘻

半完成.Yeah!

我媽媽張百家被終於半完成。車好兩塊53" x86"。

得佢自己最後檢查，加拉鏈車返埋就ok。

都幾靚丫。。。

到我車下d手作仔幫補家計先。
唔知有冇人買呢？Hand Made Tote Bag, Card Holder, Lunch Box Bag...etc.
Hand Made Stuff, Full Of Love.

520的下午茶

我家外子懶浪漫咁話， 520要陪我食lunch。點知佢真係太忙，忙到4點幾先有時間食，變左食Tea。
要不是520，我才不會跟你4點食lunch。

去左Pokka Cafe食，見幫襯佢有免費泊車麻XD

點左4樣野:

1。大蝦煎意大利飯

個飯煮完再煎，煎到脆卜卜，啖啖芝士，好香濃。

不過由於係煎既，好油膩。隻蝦都幾野味既。

2。煎餃子

普通野囉。。。可以點。

3。照燒雞翼

咸到呢！食完幾驚水腫呀！

4。提拉米蘇格格多士拼雪糕(你厚多士呀你XD)

係我最期待既一碟。點知，個樣好靚，食落一般，就好似搽左牛油既厚多士切粒拼雪糕囉。

好多野都係好睇唔以食，算啦算啦！

呢餐飯最好就係可以免費泊車，多謝晒。

百家被?拼布被?

我媽媽話:你咁得閒，比個機會你試下，學下車野啦！
嘩。。。講到好筍，黃金機會黎喇咁。。。你咪要好好感激佢呢!
原來佢要我幫佢車百家被。佢點會有咁多一少塊一少塊既布呢？
人地以前百家被，係小朋友出生一百日，去親戚朋友家果樹攞布造被造衫，代表有好多人為你送上祝福，快高長大呀，身體健康咁。
我媽媽當然冇去問親戚朋友攞布啦XD 佢係買返黎既。。。哈哈哈
即係拼布被扮百家被啦！嘻嘻
而我就走上左呢條縫紉之路。。。續塊布仔集骨都集到變阿呆。。。
不過相信整出黎係靚既!

Hi Pancakes

最近愛上Pancakes. 用黎做早餐，午餐，下午茶都好適合。

最重要係10min有得食。方便又美味。

今日早餐就整左個咸Pancake。芝士火腿蛋。配返杯檸茶。好醒神。

芝士火腿蛋pancake做法
Pancake粉50g+水40ml+蛋1隻，攪勻變粉漿
落油燒熱個平底鑊，用廚紙抹走多餘既油
將Pancake粉漿倒落平底鑊，細火煎，呢個時間加火腿上面
見粉漿成形，有一個個孔就可以反轉煎至金黃色就可上碟
之後放上芝士同流心蛋就食得喇。Woooooooo

一個焗爐搞掂之一人晚餐

今晚得返我自己一個食飯。整d簡單野食囉。
就黎夏天，要食得清減。唔可以肥dodo著背心咁cute架麻。
懶落街既我又搵雪櫃喇。有三文魚柳，青瓜，日本蕃薯仔。
好!就整你地啦！再懶d,一個焗爐搞掂你地。仲要20min食得。
焗香草三文魚拼青瓜沙律及焦糖蕃薯。

焗香草三文魚做法
三文魚柳加少少香草，黑椒，olive oil，鹽，白酒。
用錫紙包住焗20min。
食時可以加d檸檬汁

簡易青瓜沙律做法
青瓜雪凍，用刨刨青瓜片
加少少黑椒，鹽，陳醋，olive oil, 拌勻就食得

焦糖蕃薯做法
日本蕃薯切細件用錫紙包實，焗15min
打開錫紙加糖再焗5~10min至蕃薯乾身金黃，又食得

Crazy Fusion

琴晚去完馬灣飲喜酒，個景好靚呀！我地一班朋友仲坐正係男主家席隔離，受寵若驚。哈哈
不過新娘子好忙，都唔得閒應酬我地。但我地都明白既，咁多親戚朋友，又要敬茶又要影相，邊照顧到咁多野丫。我地自己招呼自己得架喇。見你出嫁我地都好開心呀。
一對新人為個婚禮搞左好多野，又有琴師啦，又有live band啦！又好多精心製作既片段啦！相當精彩。K.Danana相當佩服。其實我仲有3個月就出嫁，但自問冇耐性做咁多野。哈哈哈
不過場地個冷氣唔夠，超焗。焗到我唔舒服。所以今日晏左起身。搞到一點先食早餐。

琴晚唔舒服冇咩食野，一起身當然超級餓。見到有咩就整黎食。
就變左好Crazy Fusion既麵豉湯雜豆魚旦米XD再加杯焦糖熱谷古。哈哈哈

呢個配搭真係"傻的嗎？" 但出黎個效果又幾好味丫~呵呵呵

K.Danana的第一次

我身為K.Danana, 天下我有!
我揸匙!(屋企條門匙呀XD)
糧倉我管!(即係個廚房XD)
咁巴閉做咩要寫BLOG??? 我想同大家分享下生活點滴麻~~~(其實係無聊XD)
K.Danana新手寫BLOG, 請大家多多指教!